Gaur egun, Nafarroako Mendialdean ekintzailea izatea gero eta aukera errealagoa eta irisgarriagoa da. Hala erakusten dute CEDERNA GARALUR Elkartearen datuek. Horien arabera, 2025ean 382 ekintzaileri lagundu zien eta 120 enpresa berri sortzen lagundu zuen, autoenpleguaren bidez 130 lanpostu sortuta.
Lan hori Ekintzailetzari Laguntzeko Zerbitzuaren barnean kokatzen da. Zerbitzu hori Elkarteak ematen du Nafarroa Ekintzailea Sareko erakunde bazkide den aldetik (Nafar Lansare – Nafarroako Enplegu Zerbitzuaren baterako finantziazioarekin), eta helburua du ideiak landa-eremuan proiektu bideragarri izatea.
Gero eta emakume gehiago ekintzaile landa-eremuan
Urtean zehar laguntza jaso duten 382 pertsonetatik 226 emakumeak izan dira eta 156 gizonak. Landa-ekintzailetzan emakumeek presentzia handiagoa izatearen arrazoia da, hein batean, emakumeek besteren konturako enplegu aukera gutxiago izatea Nafarroako Mendialdean, kasurako; ondorioz, autoenplegua aukera erakargarria da haiek beren jarduera profesionala garatzeko.
Laguntza teknikoari eta etengabeko aholkularitzari esker, 120 enpresa ekimen berri jarri dira abian; horren ondorioz, 130 pertsonak alta eman dute langile autonomo gisa. Proiektu gehienak, % 95, banakako enpresaburu gisa eratu dira, ekintzailetzaren lehen urratsetan ohikoa den formula hartuta.
Joera-aldaketa erakusten duen hazkundea
urteak hazkunde nabarmena ekarri zuen aurreko urteekin alderatuta. Aurreko urtearekin alderatuta, laguntza jaso zuten pertsonen kopuruak % 20 egin zuen gora, eta sortutako enpresenak % 30.
Cederna Garalur Elkartearen iritziz, igoera hori lan egiteko eta ekintzaile izateko modua eraldatzen ari diren hainbat alderdiren batura izan zen:
- Aurrerapen teknologikoa; horrek landa-eremuetan urrunetik lan egiteko edo online saltzeko aukera ematen du.
- Lan-merkatu ezegonkorragoa; horrek pertsona asko aukera berriak bilatzera edo diru-sarrerak osatzera bultzatzen ditu.
- Jarduera-hobi berriak agertu izana, bereziki pertsonen zaintzarekin, osasunarekin, ongizatearekin, edertasunarekin, jasangarritasunarekin, digitalizazioarekin edo adimen artifizialarekin lotutakoak.
- Mentalitate-aldaketa bat, bereziki gazteen artean; horiek autonomia, malgutasuna eta kontziliazioa baloratzen dituzte, eta ekintzailetza aukera gauzagarri eta hurbil gisa ikusten dute.
- Azkenaldiko krisiak; berrikuntza eta irtenbide propioak bilatzea bizkortu dituzte.
- Eta laguntza-baliabide gehiago izatea; besteak beste, prestakuntza, laguntza-zerbitzu publikoak, ekonomia-laguntzak, zerga-onurak eta autonomoentzako tarifa laua.
Horrek guztiak berarekin ekarri du ekintzailetza gaur egun aukera ikusgarriagoa, gizartean hobeto onartua eta landa-eremuan ere aukera gehiago izatea.
Zerbitzu-sektorea, protagonista
Jarduera-sektoreei dagokienez, sortutako enpresa berrien % 92 zerbitzu-sektorekoak izan ziren. Bereziki nabarmentzekoa da pertsonak zaintzearekin lotutako ekimenen gorakada; besteak beste, fisioterapia, terapiak, estetika, edertasuna edo kirol-jarduerak. % 6 eraikuntzari eta metal-arozgintzari dagokio, eta % 2 lehen sektoreari.
Proiektua abian jartzeaz haratagoko laguntza
Cederna Garalur Elkartearen lana ez da negozio bat abian jartzearekin amaitzen. 2025ean, bi urte baino gutxiagoko antzinatasuna zuten 134 enpresari eta bi urte baino gehiagoko ibilbidea zuten 110 enpresari ere eman zitzaien aholkularitza, eta laguntzak izapidetzen, araudietara egokitzean, dibertsifikatzen eta haien jarduerak finkatzean lagundu zitzaien.
Gainera, Ekintzailetza Mahaiak eta autoenpleguari eta benetako esperientzia ekintzaileei buruzko tailerrak antolatu ziren. Halaber, Nafarroako Enplegu Zerbitzuak eta toki-erakundeek bultzatutako ekitaldietan parte hartu genuen. Horri guztiari funtsezko gaiei buruzko 9 tutorial praktiko gehitu behar zaizkio; besteak beste, Ogasunarekiko kudeaketa, ziurtagiri digitalaren erabilera nahiz fakturazioa, ekintzaileei zein zerbitzuko teknikari-taldeari bideratuta.