El Buen Vivir elkarteak bultzatu du ekimena, Caixaren Innova Social programaren eta Cederna Garalur elkartearen laguntzarekin, eta jolasa, umorea eta tokiko ondarea erabiltzen ditu komunitate-loturak indartzeko eta herrigintzarako tresna gisa.
El Buen Vivir elkarteak Kuadriketaren lehen edizioaren emaitzak aurkeztu ditu. Azken hilabeteetan Nafarroako Mendialdeko zazpi herri zeharkatu ditu proiektu honek, proposamen berritzaile batekin: jolasa, umorea eta tokiko ondarea topaketak sortzeko eta komunitatea indartzeko tresna bihurtzea.
Aurkezpen ekitaldian Fernando Urra Nafarroako Kutxa Fundazioko Komunikazio zuzendari eta Caixako Innova Social programaren ordezkariak, Ibon Mimentza Cederna Garalur Elkarteko zuzendari gerenteak eta Kuadriketa sustatzen duen El Buen Vivir elkarteko koordinatzaileak hartu dute parte.
“Herria egitearen” ideiarekin, Kuadriketa kuadrillen arteko lehiaketa gisa planteatzen da. Baina lehiaketa, batez ere, elkartzeko, parte hartzeko eta partekatzeko aitzakia bat da. Lehen edizio honetan, ekimenak Kaseda, Agoitz, Zangoza, Elo, Urrotz-Hiria, Lizoainibar-Arriasgoiti eta Jaurrieta zeharkatu ditu. Osotara, 2025eko urritik 2026ko ekainera zazpi udal edizio egin dira.
Guztira, zazpi edizioetako probetan, 580 pertsonak hartu dute aktiboki parte, 45 talde edo kuadrilletan. Datu horiek agerian uzten dute proposamenak herritarrak mobilizatzeko eta parte-hartze kolektiborako guneak sortzeko duen gaitasuna.
Ekimena ideia sinple batetik abiatzen da: elkarrekin jolastea, elkarren arteko harremanak hobetzeko. Herri bakoitzeko kuadrillak, lagun-taldeak, familiak eta beste kolektibo batzuk dira pertsonak beren herriarekin konektatzea eta, aldi berean, harreman berriak bultzatzea helburu duen jardueraren protagonistak.
Herri bakoitzerako esklusiboki diseinatutako Kuadriketa bat.
Proiektuak udalerriek beren baliabideetatik eta nortasunetik abiatuta proposamenak sortzeko duten gaitasunari ere balioa ematen dio. Horrela, herri bakoitzak bere lurraldeko alderdi bereizgarriak nabarmentzeko diseinatutako edizio bat izan du.
Modu horretan, probek eta jokoek herri bakoitzaren ondare material eta ez-materialari, historiari, tradizioei, espazioei eta elementu identitarioei buruzko erreferentziak txertatu dituzte. Horrela, ondarea, esperientzia partekatu eta dibertigarri bati lotutako elementu bizi, hurbil eta irisgarri bihurtzen da.
Umoristek ere parte hartu dute proposamenean, eta jolasak aurkeztu eta dinamizatu dituzte, umorea eta entretenimendua eskainiz eta giro lasaia eta parte-hartzailea sortzen lagunduz.
Parte-hartzaileek oso balorazio positiboa egin dute
Lehenengo edizio honen amaieran egindako ebaluazioaren emaitzek erakusten dute batezbesteko gogobetetze maila altua edo oso altua dagoela parte-hartzaileen artean. Esperientziaren balorazio positiboak, lortutako parte-hartze mailarekin batera, Kuadriketak herrietan dimentsio komunitarioa lantzen jarraitzeko tresna gisa duen potentziala adierazten du.
El Buen Vivir elkarteak ziurtatu duenez, emaitza horiek agerian uzten dute Kuadriketak etorkizuna duela eta komunitatea eraikitzen laguntzeko proposamen erabilgarria bihur daitekeela, batez ere pertsonen arteko topaketa-, partaidetza- eta harreman-guneak sortzea gero eta beharrezkoagoa den testuinguru batean.
“Lehenengo edizio honetako emaitzek aurrera egitera bultzatzen gaituzte. Ikusi dugu elkartzeko, ondo pasatzeko eta komunitate baten parte garela sentitzea ahalbidetzen diguten proposamenetan parte hartzeko interesa dagoela. Kuadriketak jolasa herrigintzarako oso tresna indartsua izan daitekeela erakusten du”, adierazi du El Buen Viver-eko koordinatzaileak.
Ainhoa Sagardoy-k, ekimen honetako partaide izan den Jaurrietako Zatoia Elkarteko idazkariak, adierazi duenez, “Kuadriketa jolasteko, barre egiteko eta adin ezberdinetako pertsonen artean ondo pasatzeko bizipena izan zen. Erronka eta proba egokituen bidez, Jaurrietari buruzko gauzak ikasi genituen, eta gure tradizioak eta ondarea pixka bat gehiago deskubritu genituen. Garrantzitsuena ez zen irabaztea, parte hartzea baizik, elkarren artean laguntzea eta gozatzea, denon artean herrigintza sustatuz. Zalantzarik gabe, belaunaldi desberdinak elkartzen jarraitzeko errepikatzeko moduko esperientzia oso dibertigarria”.
Etorkizunean jarraipena izan dezan sortutako ekimena
Kuadriketaren lehen edizioak formatua probatzeko eta etorkizunari begira ikaskuntzak biltzeko balio izan du. Herritarren parte-hartze handiak eta parte hartu dutenek adierazitako gogobetetze maila altuak indartu egiten dute ekimena garatzen eta zabaltzen jarraitzeko aukera dagoela dioen ideia.
El Buen Vivir elkartearen ustez, komunitatea eraikitzea bereziki beharrezkoa da gaur egun, eta hurbiltasunetik, partaidetzatik eta gozamen partekatutik loturak sortzeko formulak aztertzen jarraitzearen alde egiten du.
Kuadriketak, hain zuzen ere, formula horietako bat izaten jarraitu nahi du: proposamen erraza, parte-hartzailea eta lurralde bakoitzera egokitzeko modukoa, jokoa eta ondarea askoz garrantzitsuagoa den zerbaitetarako abiapuntu gisa erabiltzen duena: elkartzeko, partekatzeko eta herrigintza bultzatzeko.
Proiektuak Innova programaren babesa izan du eta Cederna Garalur Elkartearen eta udalerri parte hartzaileen lankidetza.